ദോഹ: ഹമദ് ജനറൽ ആശുപത്രിയുടെ അടിസ്ഥാന സൗകര്യങ്ങളും സംവിധാനങ്ങളും പൂർണ്ണമായി നവീകരിക്കുന്നതിനുള്ള വൻകിട വികസന പദ്ധതിക്ക് ഖത്തർ പൊതുമരാമത്ത് അതോറിറ്റി (അശ്ഗാൽ) തുടക്കം കുറിച്ചു. ഹമദ് മെഡിക്കൽ കോർപ്പറേഷനുമായി (HMC) സഹകരിച്ച് നടപ്പിലാക്കുന്ന പദ്ധതിയുടെ ആകെ ചെലവ് ഏകദേശം 1.179 ബില്യൺ ഖത്തർ റിയാലാണ്. 2027 മൂന്നാം പാദത്തോടെ നിർമ്മാണം പൂർത്തിയാകുമെന്ന് അധികൃതർ അറിയിച്ചു.
ആശുപത്രിയുടെ പ്രവർത്തനക്ഷമതയും സുരക്ഷാ മാനദണ്ഡങ്ങളും അന്താരാഷ്ട്ര നിലവാരത്തിലേക്ക് ഉയർത്തി രോഗികൾക്ക് മികച്ച വൈദ്യസഹായം ഉറപ്പാക്കുകയാണ് പദ്ധതിയുടെ ലക്ഷ്യം. നിർമ്മാണ പ്രവർത്തനങ്ങൾ നടക്കുമ്പോഴും ആശുപത്രിയുടെ അത്യാവശ്യ സേവനങ്ങൾ തടസ്സപ്പെടാതിരിക്കാൻ മൂന്ന് പ്രധാന ഘട്ടങ്ങളായാണ് വികസനം നടപ്പിലാക്കുന്നതെന്ന് അശ്ഗാൽ ഹെൽത്ത് പ്രൊജക്ട്സ് വിഭാഗം ആക്ടിംഗ് തലവൻ എൻജി. അഹമ്മദ് അൽ ഇമാദി വ്യക്തമാക്കി.
പുതിയ ഡേ സർജറി കെട്ടിടത്തിന്റെ നിർമ്മാണം, ഔട്ട്പേഷ്യന്റ് ടവറിന്റെയും പ്രധാന കെട്ടിടത്തിന്റെയും നവീകരണം, നോർത്ത്-സൗത്ത് ഇൻപേഷ്യന്റ് ടവറുകളുടെ പുനരുദ്ധാരണം, അടിയന്തര സേവന സംവിധാനങ്ങൾ മെച്ചപ്പെടുത്തൽ എന്നിവ പദ്ധതിയുടെ ഭാഗമായി പൂർത്തിയാക്കും.
ആശുപത്രിയുടെ മെക്കാനിക്കൽ, ഇലക്ട്രിക്കൽ സംവിധാനങ്ങൾ, ഡ്രെയിനേജ് ശൃംഖല തുടങ്ങിയവ പൂർണ്ണമായും നൂതന സാങ്കേതികവിദ്യയോടെ മാറ്റിസ്ഥാപിക്കുമെന്ന് പ്രൊജക്ട് എൻജിനീയർ മർയം അൽ മർസൂഖി അറിയിച്ചു. വളർന്നുവരുന്ന ആരോഗ്യ ആവശ്യങ്ങൾക്കനുസരിച്ച് അടിസ്ഥാന സൗകര്യങ്ങൾ അത്യാധുനിക രീതിയിൽ സജ്ജമാക്കുന്നതിന്റെ ഭാഗമായാണ് ഈ വികസനമെന്ന് എച്ച്.എം.സി ഹെൽത്ത് കെയർ ഫെസിലിറ്റീസ് വികസന വിഭാഗം മേധാവി ഹമദ് അൽ ഖലീഫ പറഞ്ഞു.
